【「與腦癇同行 維港遊同樂日」圓滿結束】多謝大家支持

感謝大家踴躍參加由國際腦癇日 - 香港2025籌備委員會舉辦嘅「與腦癇同行 維港遊同樂日」，喺陽光明媚嘅下午，「腦癇號」載住大家喺維港暢遊，共度咗一個充滿歡笑同意義嘅時光！

活動期間，我哋好高興邀請到腦神經科專科許庭軒醫生為大家講解腦癇症嘅最新治療資訊同生活管理小貼士，仲有香港協癇會嘅偉雄亦分享咗腦癇病友嘅就業情況，令大家對腦癇症有更深入嘅認識。更榮幸邀請到重量級嘉賓——骨科專科醫生高永文到場支持，並分享咗有關國際腦癇日嘅背景，令大家更了解呢個全球性嘅重要日子！活動上亦設有攤位遊戲「腦癇知多啲」同「腦癇達人拋豆袋」，以及「填色樂繽紛」活動，令大家喺輕鬆愉快嘅氣氛下加深對腦癇症嘅了解。

其實腦癇症並唔係罕見病，喺香港每20人就有1人一生中曾經出現過腦癇發作，全球更有超過5000萬人受到腦癇症影響，就連拿破崙、牛頓同達文西呢啲歷史偉人都係腦癇症患者。希望透過今次活動，大家可以更加了解腦癇症，並消除誤解，一齊推動社會共融！

活動期間仲影咗好多靚相，包括大家嘅精美填色作品，並將會陸續喺Facebook專頁上發佈，記得密切留意，睇吓有無你嘅作品喇！另外提提大家，「齊走5000萬步 守望腦癇症患者」步行活動仲繼續進行緊，只要Like我哋專頁，用計步應用程式記低每日步數，喺2月10日「國際腦癇日」或之前上載步行記錄，就可以一齊為腦癇症患者出一分力。

今次活動得以圓滿結束，實在有賴每一位病友、家屬、醫護同籌備委員會成員機構嘅參與同支持，希望大家玩得開心之餘，亦對腦癇症有更多嘅認識，下次活動再見！